மும்பை: யார்ட்லி நிறுவனத்தின் ஆசிய, மத்தியக் கிழக்கு மற்றும் ஆஸ்திரலேஷிய பிரிவின் வர்த்தக உரிமையைப் பெற்றுள்ளது விப்ரோ நிறுவனம்.

இதற்காக விப்ரோவின் நுகர்வோர் பொருள் மற்றும் லைட்டிங் வர்த்தக பிரிவு 45.5 மில்லியன் டாலர்களை யார்ட்லி தயாரிப்பாளர்களான லோர்னமீட் குழுமத்துக்கு செலுத்துகிறது.

இந்த நிதியாண்டில் விப்ரோ நிறுவனத்தின் நுகர்வோர் பிரிவு செய்துள்ள மிகப்பெரிய இணைப்பு நடவடிக்கை இது. இதற்கு முன் உன்சா நிறுவன இணைப்புக்காக 256 மில்லியன் டாலர் செலுத்தியது விப்ரோ.

இதன் மூலம் யார்ட்லி தயாரிப்புகளை ஆசியா, மத்தியக் கிழக்கு நாடுகள், ஆஸ்திரலேஷியா எனப்படும் ஆஸ்திரேலியா, நியூஸிலாந்து, பப்புவா - நியூ கினியா, சாலமோன் தீவுகள், சில ஆப்பிரிக்க நாடுகளிலும் விற்பனை செய்யும் உரிமையை விப்ரோ பெற்றுள்ளது. இத்தகவலை விப்ரோ கன்ஸ்யூமர் கேர் தலைவர் விநீத் அகர்வால் தெரிவித்துள்ளார்.

யார்ட்லியின் ஐரோப்பிய, அமெரிக்க விற்பனை உரிமையை லேர்னமீட் நிறுவனமே வைத்துக் கொண்டுள்ளது. புராக்டர் அண்ட் கேம்பிள் வசமிருந்த யார்ட்லி உரிமையை கடந்த 2005-ல்தான் லோர்னமீட் பெற்றது நினைவிருக்கலாம்.